संवाददाता
भक्त बिक
कैलाली। घोडाघोडी बहुमुखी क्याम्पसमा माध्यमिक र स्नातक तहको क्याम्पस स्तरीय नृत्य प्रतियोगिता सम्पन्न भएको छ । आज मंगलबार अखिल क्रान्तिकारी इकाई कमिटीको आयोजनामा क्याम्पस प्राङ्गणमा सम्पन्न कार्यक्रममा घोडाघोडी बहुमुखी क्याम्पस कक्षा ९ देखि स्नातक तहका विद्यार्थीहरूको सहभागिता रहेको थियो । नृत्य प्रतियोगितामा प्रथम स्थान हासिल गर्न सफल गितिका सोनामले ५ हजार नगद प्राप्त गरेकी छन् । त्यस्तै द्वितीय भएकी सलोनी रावल र तेस्रो स्थान हात पार्न सफल प्रेरणा चौधरी, काजल कठरिया र किरण चौधरीको समूहले क्रमश ३ र १ हजार प्राप्त गरका छन् ।
माध्यमिक र स्नातक तहका एकल तथा सामूहिक गरि १२ वटा नृत्य प्रस्तुत भएका थिए । सहभागि मध्य उत्कृष्ट ४ लाई प्रमाण पत्र सहित नगद पुरस्कार प्रदान गरिएको हो । कक्षा ९ मा अध्ययनरत सान्त्वना आगन्तुक अधिकारीले सान्त्वना पुरस्कार प्राप्त गरिन् ।
अखिल क्रान्तिकारी घोडाघोडी बहुमुखी क्याम्पस इकाई कमिटीका अध्यक्ष गणेश भण्डारीको अध्यक्षतामा भएको प्रतियोगिताको प्रमुख अतिथि मोहन्याल गाउपालिका अध्यक्ष देविदत्त उपाध्याय रहेका थिए । कार्यक्रममा घोडाघोडी बहुमुखी क्याम्पसका प्राध्यापकहरू, स्वतन्त्र विद्यार्थी युनियन सभापति प्रेम बोगटी, विभिन्न विद्यार्थी सङ्गठनका प्रतिनिधि सहित माध्यमिक र स्नातक तहमा अध्ययनरत विद्यार्थीको उपस्थिति रहेको थियो । कार्यक्रमको सञ्चालन घोडाघोडी बहुमुखी क्याम्पस अखिल क्रान्तिकारी इकाई कमिटीका सचिव दान बहादुर ताडीले गरेका थिए ।
